2022年3月8日 星期二

兩餸飯

 朋友係"獨家村",對晚市禁堂食極度不滿。

朋友說:"我有個諗法,比禁晚市堂食好,起碼可以幫補到D食肆…"

"疫情咁樣,可以唔禁堂食咩?"我問。

"得,就係每張枱只可以坐一個人,咁樣一定好過晚市堂食全禁!"朋友答得非常堅定,有三個感嘆號。

"?"我問。
"你諗下:疫情之前,我呢D孤客,夜晚食飯,唔係要同人搭枱,就係俾人左趕右趕瑟縮角落﹔家陣有疫情,你俾枱枱只坐一個,一黎人少,二黎坐得疏,三黎我地可以堂堂正正、光明正大咁堂食,唔使再受歧視,老細又有錢袋頂住個雞頭,係咪好呢你話!"
朋友激動地答。
"咁又係,少客好過無客…"我嘗試搭嗲。
"緊係,買番屋企自己食,喺嗰度又自己食,點解唔俾我一枝公堂食…"朋友回覆。
"但係咁樣會唔會等好耐呢?等得耐,咪又係外賣算數…"我嘗試提出疑問。
"你份人可唔可以唔好咁膚淺呢? 食飯,唔止醫肚咁簡單,佢係一種生活態度…"朋友反駁。
"迫不得已都係一種態度?" 我心諗。
"我相信好多人都好似我咁諗,We are not alone…"朋友答。
然後佢SEND張佢食緊既飯盒幅相俾我。
直至我SEND番個雙眼心心既mojie俾佢,
佢先肯介紹完佢個兩餸飯。

清零

 Omicron繼續肆虐,身邊人無人不中,包括阿強。

“我身邊,十個有七、八個中,都要在家隔離﹔個個中招在家隔離,仲使鬼禁足?”阿強問。
“係,咁既時勢,雖不中,亦不遠矣…”我答道。
“講到中招咁大鑊,其實係咪應該調番轉捉晒你地D無招既人黎好好保護? 只准俾中招既人返工、出街,經濟咪復蘇囉!” 阿強說。
“咁攪法,真係唔知點清零…”我問阿強。
“我地清零係叫 “動態”,咩叫動態? 就係去到咁上下,當中招既多過你地D未中招既,到時清零就係清你地零啦。人人都中,嗰個就唔係叫疫情,叫新常態,新新下就係常態,再過幾日咪就係自然現象囉。” 阿強話。
阿強繼續喋喋不休:“你以為外國嗰D叫 "共存"? 講到尾咪係唔在意你中唔中、幾多人中,中晒都無相干,放任清零,清走晒你D無中招、係都要載口罩既人囉! 所謂共存、動態清零﹐最後一定殊途同歸,你話疫情嚴峻,我話形勢大好,做到衞星田日產萬斤就是讚!"
“你係咪病到傻左呀,強哥…”我問佢。
“你就傻?!我而家喺竹篙灣,不知諗通左幾好多野…你諗野就係弊在唔夠動態…”阿強說。

消費消費劵

 又有消費劵,分期派,分期洗,真心興奮。

包括阿強。

“咁想我地專心消費,不如出糧出消費啦!我建議高官帶頭全劵出糧,以身作則。” 阿強說。
“最好佢地D消費劵唔止有限期,用唔晒既會喺份糧倒扣...甚至連退休份長糧都咁樣處理,兼只限本人喺香港使用,咁就一定可以確保愛國者留港建港,仲完勝美帝制裁!” 阿強繼續自言自語。
我唔敢想像。
“講到要推動消費,我仲有大把計:例如買國貨有稅退,買得多退最多,等國貨可以走出去,貢獻大灣區!”阿強開始得意忘形。
“車,而家D舖一係收早,一係執笠,我咪又係攞D劵黎買兩餸飯…與其話促進費,不如話幫補家計。”我說。
“…又可以叫D達官貴人捐D消費劵出黎抽,每日喺無記東張西望現場直播攪珠盛事…近排咪話打針既人仲未夠多嘅,咁不如每打一針送1,000消費劵,實谷得掂!家陣見個勢,話唔定長打長有,到時打針地方多過美沙酮診所,阿婆可以儲埋茶錢,咪可以見下個有茶飲先出黎既孫仔…希望到時唔使阿婆自己去攞位啦…” 阿強繼續疾走。
“醒喇阿強,講咁多無謂野,諗下點洗好過啦…”我跟阿強說。
“唔…我今次醒喇,諗住用八達通黎攞D消費劵,然後俾張咭我老媽子當家用…”阿強猶豫一會後答道。
“咁都得…伯母佢肯收咩?”我好奇問阿強。
“車,你話我知:俾消費劵同俾現錢,有分別咩?” 阿強斬釘截鐵說道。
我唔識答。