疫情期間，成個球場，就只得呢個四眼仔。
佢不斷走籃，不停投球。
即使個籃球架早就拆走左個框，得番塊鐵板。
但佢依然繼續走，繼續投。
“哥哥仔，無框你都照打? 你知係入波定中框咩? ”我問四眼仔。
我懷疑四眼仔早就留意到我 – 因為嗰場得我兩丁友 – 早前走籃時已經不時回頭望。家陣我咁樣一問，佢好似打左個突，索性停低腳步，成個人向著我。
“打左先講!” 四眼仔說，大汗淋漓。
“疫苗就話打左先講啫，無框點打波?”我問四眼仔。 “你唔好同我講D咩心中有籃呀…咩只在乎過程咁樣…”
四眼仔無即時答我，徑自回過身來再次走籃。一步、兩步、三步，成個人跳起，左手伸直，籃球擊中鐵板既黑間空格。
“做運動唔可以清零，至少可以幫我同病毒共存卦我估…”四眼仔開始喋喋不休。“難得可以自己一個霸晒全場，唔使同人爭波打，又唔會俾人嫌屎波，更加睇唔到D人點好波。只要嗰波喺嗰個黑色長方形嗰度，我就當入，就係咁簡單…”
“我就係見你咁都打得到好High，無停過…”我說。
“如果無框就唔打，好快就會放低唔打，覺得咁樣齋掟好白痴。之後時間一過，就會覺得自己反正無打咁耐，由佢算，結果最後丟低左…” 四眼仔說。
“咁你就靠憑空想像，繼續令你打波?”我問四眼仔。
“係卦…好似你平時見街度有人掘窿，仲會圍住D阿叔喺度眼望望，仲要望極都唔肯走，好似真係發現到D咩咁…嗰D阿叔日日百無聊賴，唔係飲茶足棋就係賭馬，但係一見到佢地對住個窿都可以左𥄫右𥄫，我就會諗：如果做人去到咁既年紀都可以咁有好奇心，又幾好喎…”四眼仔說。
“車，你鬼知D阿伯點解咁鐘意望住窿咩?又關打無框波咩事?”我問四眼仔。
我仲未問完，四眼仔已經又一個走籃，迅從著地。
“有無嘢望，有無框打，都係要俾D想像，咁個人先可以keep going。向前行又好，原地轉又好，仲之就keep going。” 四眼仔說。
“原地轉，咁咪即係無郁過?”我說。
“咁你咪當自己係個陀螺囉! 嗰下以為自己原地X轉，話唔定其實已經去到好遠呢!” 四眼仔說。“係喎，同你吹左咁耐，識唔識打波既你，呢度得你同我，有無興趣打番場?”
“吓，無晒框，點分勝負呀!”我笑著說。
“當有框、當入波咪得囉，X求其啦，最緊要keep going!” 四眼仔說。
結果我地兩個人打左成粒鐘。
我話和。
佢話佢贏。
我話係我擺明讓佢。
