2022年3月14日 星期一

一人堂食

 https://www.facebook.com/%E4%BA%BA%E9%96%93%E5%81%B4%E5%AF%AB%E5%B8%AB-107964178502298/?ref=page_internal

朋友係"獨家村",對晚市禁堂食極度不滿。

朋友說:"我有個諗法,比禁晚市堂食好,起碼可以幫補到D食肆…"

"疫情咁樣,可以唔禁堂食咩?"我問。

"得,就係每張枱只可以坐一個人,咁樣一定好過晚市堂食全禁!"朋友答得非常堅定,有三個感嘆號。

"?"我問。

"你諗下:疫情之前,我呢D孤客,夜晚食飯,唔係要同人搭枱,就係俾人左趕右趕瑟縮角落﹔家陣有疫情,你俾枱枱只坐一個,一黎人少,二黎坐得疏,三黎我地可以堂堂正正、光明正大咁堂食,唔使再受歧視,老細又有錢袋頂住個雞頭,係咪好呢你話!"

朋友激動地答。

"咁又係,少客好過無客…"我嘗試搭嗲。

"緊係,買番屋企自己食,喺嗰度又自己食,點解唔俾我一枝公堂食…"朋友回覆。

"但係咁樣會唔會等好耐呢?等得耐,咪又係外賣算數…"我嘗試提出疑問。

"你份人可唔可以唔好咁膚淺呢食飯,唔止醫肚咁簡單,佢係一種生活態度…"朋友反駁。

"迫不得已都係一種態度?" 我心諗。

"我相信好多人都好似我咁諗,We are not alone…"朋友答。

然後佢SEND張佢食緊既飯盒幅相俾我。

直至我SEND番個雙眼心心既mojie俾佢,

佢先肯介紹完佢個兩餸飯。


2022年3月12日 星期六

搵錢捐烏克蘭


超市連M巾都一掃而空。
我好感動。
直覺令我相信:D 巾係俾人掃黎,捐晒去烏克蘭。
有咁既聯想,全因我放工時經過地鐵站,見到聯合國既燈箱,話烏克蘭有人道災難,刻不容援,需要我既捐助。
嗰度呢刻需要你既調停,你竟然仲醒起要我既捐助。
原來,我係聯合國眼中係咁重要,直澄國家元首一樣。
廣告無講係咪好似資助兒童咁,每日兩三蚊,就夠個第三世界既細路買跑車、大食大喝。
但係家陣打仗,我投資損手爛腳,兩餸飯都要當兩餐飯。
場仗早打完,經濟早D恢復,我荷包鬆番,就有錢捐。
但係我諗諗下又覺得有D慚愧,喺香港就話好多野唔到我理,但係我同歐洲人同屬地球村,點可以咁冷血。
所以我拿拿聲上網,睇下外國有無開盤邊個國家WIN,發現原來最好攻陷既城市、邊日攻陷、邊度受襲、邊日會有和議、領袖下場係點,都有晒彩池賠率,資料詳盡到極。
局劫瞬息萬變,我但憑一顆熱心,拿拿聲花左一晚通頂研究,愈睇得多新聞同資訊,愈係心酸,成件事就變得更刻不容緩。
終於揀定左買咩。
亦決定左買幾多。
閤埋眼,㩒個掣,個心只望速戰速決,早早派彩。
話晒刻不容援。
我肯定,無論結果如何,都對烏克蘭有利。
算係盡我綿力。

2022年3月11日 星期五

打波射空框

疫情期間,成個球場,就只得呢個四眼仔。

佢不斷走籃,不停投球。

即使個籃球架早就拆走左個框,得番塊鐵板。
但佢依然繼續走,繼續投。
“哥哥仔,無框你都照打? 你知係入波定中框咩? ”我問四眼仔。
我懷疑四眼仔早就留意到我 – 因為嗰場得我兩丁友 – 早前走籃時已經不時回頭望。家陣我咁樣一問,佢好似打左個突,索性停低腳步,成個人向著我。
“打左先講!” 四眼仔說,大汗淋漓。
“疫苗就話打左先講啫,無框點打波?”我問四眼仔。 “你唔好同我講D咩心中有籃呀…咩只在乎過程咁樣…”
四眼仔無即時答我,徑自回過身來再次走籃。一步、兩步、三步,成個人跳起,左手伸直,籃球擊中鐵板既黑間空格。
“做運動唔可以清零,至少可以幫我同病毒共存卦我估…”四眼仔開始喋喋不休。“難得可以自己一個霸晒全場,唔使同人爭波打,又唔會俾人嫌屎波,更加睇唔到D人點好波。只要嗰波喺嗰個黑色長方形嗰度,我就當入,就係咁簡單…”
“我就係見你咁都打得到好High,無停過…”我說。
“如果無框就唔打,好快就會放低唔打,覺得咁樣齋掟好白痴。之後時間一過,就會覺得自己反正無打咁耐,由佢算,結果最後丟低左…” 四眼仔說。
“咁你就靠憑空想像,繼續令你打波?”我問四眼仔。
“係卦…好似你平時見街度有人掘窿,仲會圍住D阿叔喺度眼望望,仲要望極都唔肯走,好似真係發現到D咩咁…嗰D阿叔日日百無聊賴,唔係飲茶足棋就係賭馬,但係一見到佢地對住個窿都可以左𥄫右𥄫,我就會諗:如果做人去到咁既年紀都可以咁有好奇心,又幾好喎…”四眼仔說。
“車,你鬼知D阿伯點解咁鐘意望住窿咩?又關打無框波咩事?”我問四眼仔。
我仲未問完,四眼仔已經又一個走籃,迅從著地。
“有無嘢望,有無框打,都係要俾D想像,咁個人先可以keep going。向前行又好,原地轉又好,仲之就keep going。” 四眼仔說。
“原地轉,咁咪即係無郁過?”我說。
“咁你咪當自己係個陀螺囉! 嗰下以為自己原地X轉,話唔定其實已經去到好遠呢!” 四眼仔說。“係喎,同你吹左咁耐,識唔識打波既你,呢度得你同我,有無興趣打番場?”
“吓,無晒框,點分勝負呀!”我笑著說。
“當有框、當入波咪得囉,X求其啦,最緊要keep going!” 四眼仔說。
結果我地兩個人打左成粒鐘。
我話和。
佢話佢贏。
我話係我擺明讓佢。

2022年3月10日 星期四

緊急警報

我同阿強都認同,收緊急警報唔係問題,問題係嗰聲,失驚無神,好刺耳,根本就係電視台攞黎MUTE粗口既聲。

有大把音樂可以揀。
例如國歌,實無衰,無人批評,一聽個個起敬,專心恭讀,有效傳遞信息。
又或者獅子山下,雖則一聽就知大鑊嘢,但勝在夠溫和,長輩好受。
“我覺得可以用ICQ嗰”噢噢”,D回憶即刻返晒啦,成件事當堂Q晒…” 我說。
“個系統洗左咁多錢,查實可唔可以多D功能呢? 例如你無Do安心出行,手機就會突然長響,響到你Do為止?” 阿強話。
“係喎,仲可以用黎提你打針。你話有咩緊急得過打針?” 我說。
“仲有投票,係喇,一於響到最大聲,每隔一個鐘就BiBiBi,提你盡公民責任…”阿強說。
“但係用得太濫,就無咩嘢係緊急架喇喎…” 我問阿強。
“有咩所謂,你要睇緊急嘢,有咩快得過FB updates?”阿強話。
“不過講咩都假,我最想既係政府熱線嗰D接線生,個個手機都裝左呢D通報系統,一有人打入黎就Bi佢一Bi,每等多10分鐘就再Bi,打唔通就長Bi,Bi到有人聽為止,到時我唔介意等下…”阿強說。
講講下,突然間個電話又無端長Bi,嚇到我地兩個彈起。
“嘩,咩料今次!?”我即刻睇手機。
“哦,係提你唔好關左嗰聲效或者有咩改動,唔係聽唔到緊急通報喎…呢D就真係緊急喇!” 阿強說。

2022年3月9日 星期三

廿年後的電話

 分手左廿年既前度男友,突然打黎,最後舊情復熾,結婚收場。

“如果我收到咁既電話,第一個反應會係懷對方賣保險、借錢,甚至報仇?”我說。
“念念不忘定死唔斷氣,都係一念之差…”翹姐說。“我係覺得呢廿年同個男人行埋既女人有D慘囉…"
“真係做戲咁做…"我說。
“你唔好話,其實個女人都好危險:廿年磨劍,結局美滿還好,大吉利是又離婚收場,情殺都似…"翹姐說著說著,不期然翹起二郎腿,吐一縷輕煙。
“就係嗰女人既啱啱離婚,正值人生低潮,突然遇番嗰個識於微時既前度。你話對方乘虛而入又好,想黎多次初戀無限美又好,俾佢痴心情場劍感動到都好,嗰下天雷地火,好難唔中…”我說。
“問心,嗰男人可以痴情廿年,係因為無住你廿年啫!”翹姐說。“嗰股潛藏左廿年既幻想突然浮面,咁鬼澎湃,真係無堅不摧。倘若個女人發覺得都嗰男人行唔到落去,邊有咁易篤得穿個男人既Bubble,到頭黎盞佢死Lur﹔就算篤得穿,嗰下爆炸力隨時勁過漏煤氣點火,炸到大家支離破碎…”翹姐又吐出一縷輕煙。
“男既停留喺廿年前既你,你就早已歷盡風塵,淨係呢樣野已經唔同步…”
“翹姐,呢個世界童話最賣紙,亦都好需要童話。”我說。
“童話呢D先易上癮,仲要係你上左癮都唔為意,到要戒既時候,點止嗰兩、三晚典床典席…”翹姐弄熄了煙,低頭望著手機,上掃下掃。
“寫得童話既人,點會天真?” 翹姐說。

2022年3月8日 星期二

兩餸飯

 朋友係"獨家村",對晚市禁堂食極度不滿。

朋友說:"我有個諗法,比禁晚市堂食好,起碼可以幫補到D食肆…"

"疫情咁樣,可以唔禁堂食咩?"我問。

"得,就係每張枱只可以坐一個人,咁樣一定好過晚市堂食全禁!"朋友答得非常堅定,有三個感嘆號。

"?"我問。
"你諗下:疫情之前,我呢D孤客,夜晚食飯,唔係要同人搭枱,就係俾人左趕右趕瑟縮角落﹔家陣有疫情,你俾枱枱只坐一個,一黎人少,二黎坐得疏,三黎我地可以堂堂正正、光明正大咁堂食,唔使再受歧視,老細又有錢袋頂住個雞頭,係咪好呢你話!"
朋友激動地答。
"咁又係,少客好過無客…"我嘗試搭嗲。
"緊係,買番屋企自己食,喺嗰度又自己食,點解唔俾我一枝公堂食…"朋友回覆。
"但係咁樣會唔會等好耐呢?等得耐,咪又係外賣算數…"我嘗試提出疑問。
"你份人可唔可以唔好咁膚淺呢? 食飯,唔止醫肚咁簡單,佢係一種生活態度…"朋友反駁。
"迫不得已都係一種態度?" 我心諗。
"我相信好多人都好似我咁諗,We are not alone…"朋友答。
然後佢SEND張佢食緊既飯盒幅相俾我。
直至我SEND番個雙眼心心既mojie俾佢,
佢先肯介紹完佢個兩餸飯。

清零

 Omicron繼續肆虐,身邊人無人不中,包括阿強。

“我身邊,十個有七、八個中,都要在家隔離﹔個個中招在家隔離,仲使鬼禁足?”阿強問。
“係,咁既時勢,雖不中,亦不遠矣…”我答道。
“講到中招咁大鑊,其實係咪應該調番轉捉晒你地D無招既人黎好好保護? 只准俾中招既人返工、出街,經濟咪復蘇囉!” 阿強說。
“咁攪法,真係唔知點清零…”我問阿強。
“我地清零係叫 “動態”,咩叫動態? 就係去到咁上下,當中招既多過你地D未中招既,到時清零就係清你地零啦。人人都中,嗰個就唔係叫疫情,叫新常態,新新下就係常態,再過幾日咪就係自然現象囉。” 阿強話。
阿強繼續喋喋不休:“你以為外國嗰D叫 "共存"? 講到尾咪係唔在意你中唔中、幾多人中,中晒都無相干,放任清零,清走晒你D無中招、係都要載口罩既人囉! 所謂共存、動態清零﹐最後一定殊途同歸,你話疫情嚴峻,我話形勢大好,做到衞星田日產萬斤就是讚!"
“你係咪病到傻左呀,強哥…”我問佢。
“你就傻?!我而家喺竹篙灣,不知諗通左幾好多野…你諗野就係弊在唔夠動態…”阿強說。