2011年6月7日 星期二

為咩要上天堂?

點解要上天堂?有咩好上?
如果天堂真係一個好地方,有病何必醫?
有d人話:上到天堂,你有永生,會無憂無慮,會好快樂,因為你可以親近上帝。
但係家陣你唔係日日夜夜都同上帝祈緊禱既咩,咁同親身喺佢身邊,爭幾遠?
更重要既係,究竟你上到天堂之後,係因咩而快樂?當真因為所謂親近上帝而快樂,還是你喺天堂根本無可能唔快樂,你必須快樂,你只能快樂?You are to be become programed to be happy in heaven?
嘗試以一個在世既人既眼光望番轉頭,呢個上左天堂、恒常快樂既你,你認唔認得出?呢個你,仲係唔係你?
我成日覺得,天堂若然存在,佢會係一個特大rave場:人人都狂啪搖頭丸ecstasy,永世狂歡跳舞,表面上人人好歡樂,而當事人亦都可能真係覺得自己好興奮,但係呢種快樂,係一種無意識既快樂,pavlovian式既快樂。一個再無煩惱無挫折無悲傷無苦痛無感情無慾望無記憶無牽掛既你,一個純因神在身邊就自動快樂既你,根本已經唔係你熟識既自己。
面對住一個連你都覺得陌生既自己,你仲會快樂?
又或者試想一下:大佬,永生喎,你喺凡間嗰時都覺度日如年,你喺天堂真係可以一d煩惱都無、快樂到底?
一個只識得快樂永遠既人,一個除歡樂以外任何情緒都無以為繼既人,佢重係唔係一個完整既人?
明明上左天堂,點解個人反而會變得殘缺不全?
當然啦,去到天堂,你都顧住快樂,你唔會再在意會到自己有任何欠缺或失去什麼。
咁同靠啪丸去逃避無以面對既自己,真係無咩分別。
又如你人在北韓,領袖話你聽呢度係人間天堂,你要快樂,你應該快樂,你唔快樂就唔正常,潛移默化之下,你慢慢以為自己真係喺天堂。原因係,有偉大領袖喺度保守你,你要感恩,要happy。
真正既快樂,係有由無到有,由失到得,由渴求到追求,由付出到成功,由翹首到如願,由虛無到有價值。去到天堂,自動上鏈快樂,嗰d根本唔再係快樂。當你無法再經歷、感受不樂或未樂,你就唔會再知咩叫快樂,一切純粹外露的興奮狀態,都不過生理表徵,這個國度,快樂絕跡。上天堂,係為左唔想再做人。唔再做人既代價,就係永世成了一架亢奮既機器。