2011年12月18日 星期日

水水公園遊


不論老幼,去到水水公園,都會自覺童心未泯。

昨日,結伴到水水公園,金鐘巴士站人龍水蛇春,去玩,緊係要分秒必爭,所以打的。

的士司機人風趣,成程車教大家點識女仔。佢話佢高峰時期同時有五個女朋友,我地得啖笑,正想拍掌之際,佢愈講愈起勁,話識女仔最緊要有架車,可以載佢地呢度去嗰度去。

司機,講到車呢家野,我地原來係諗住搭巴士去水水公園…

哦,唔緊要,識女仔呢家野最緊要面皮厚,衝埋去就得,不過講開又講,以前尐女仔係易追尐既,家陣尐女仔學識高左…

去到水水公園,周圍係人,尤其特多同胞組團來遊。由於今日係朋友公司包場,所以帶條手帶就可以玩到夜晚十點半,人地六點清場,我地就可以繼續喺入面磨。入到去,一黎緊係上山,搭嗰架海洋列車,人未入閘,就見成班同胞衝鋒陷陣中國式排隊首尾不見,感覺好似喺羅湖一樣,好唔容易先迫到上車。架車上山,落車即到撲啱十二月八號開幕既動感樂園。

顧名思義,動感樂園緊係主打機動遊戲。朋友成世謹慎,雙腳離地就見暈,所以專揀尐安全系數高既機動遊戲。接納等於支持,大家決定先黎一個普度激流,一班人坐喺架圓型似sink盤塞既船沿著條激流氹氹轉,沿途會無端彈出條水柱瞄你黎射。排隊時見有雨衣賣,盛惠廿五,昆水力驚人。

唔知係唔係無買雨衣既關係,成程船尐水柱都追住我地黎射,好似洗車一樣。唔係俾水射,就係架船左顫右顫,前一秒撞到你腰骨挺直,後一秒就緊接背後射黎一串小便般大既水,天寒地凍褸濕褲濕,臨尾仲要有工作人員懶親切走黎同你影幅相,都唔知係唔係攞黎俾我投訴用。

身已濕,當然要吹乾,眼光直指 動感快車,坐上去人兩腳凌空條條fing,又越過高山又越過谷,就喺人地眼前絕塵而過。謹慎朋友睬你都傻,專心去排碰碰車,其他人唯有行去排隊坐快車。人通地都係,排足成個鐘,兼且處身高地狂吹西北風,一路排,一路見架快車喺身邊飛過,人人殺豬般慘叫,果然,等待係最恐佈。

上到架車,一字排開齊齊坐,眼鏡其他野一律除底,地下有尐機動野開開合合,感覺好似GUNDAM。坐上去,架車一路上,一路上,條斜好長好高,高到望見一大截我地排隊時都睇唔到既路軌。

!尐路軌邊度黎架…

說時遲那時快,驚嘆得黎,架車已經向下俯衝,沖廁一樣。車快風大,顧得嗌時,都已唔經佢係上定落定打圈。成條路軌意粉一樣,好似可以任意扭曲,成個人喺寒風中俾架車拋左拋右,彈指間,就完。

到站前聽到後面嗰哥仔大嗌 嘩,好無聊呀!”

玩完,嗰人好感動,雙眼流淚,大風吹出一池眼水。去到櫃台睇番影低嗰幅相,真係想買黎親自delete - 嗰樣俾鬼嚇一樣,頭髮直豎,兩眼大瞪,效果一如我一向既結論:我照鏡好睇過影相。

話就話玩到涕淚交流,但係我地前後都玩左三次快車,由第一行坐到中間,由驚呼狂叫玩到悶出個鳥來,再高再打圈,玩多了,就覺不外如是。唔係我地特別勇,而係架野本來就唔見得有幾恐佈,當你重犯咁安全帶左扣又扣,夜媽媽又見唔到周圍有咩,排隊時見到話驚,玩嗰尐其實樂在其中。

跟住我地就去玩個翻天覆地,即係人兩腳條條fing 360度極速旋轉,去到最高點仲要你停底幾秒倒吊凌空,朋友差尐想縮沙。

喂,架野話就話唔啱尐有心臟病嗰尐人玩,但無玩唔啱尐淆底既人玩喎,玩啦!”

排緊隊,見到隔離有個迷你笨豬跳:小朋友住兩條彈弓喺張彈床上面彈下彈去。睇得出佢地個樣一臉無奈,分分鐘原地跳繩跳得仲高,而尐工作人員就自顧自吹水任佢彈,迫供一樣。

講番翻天覆地,玩完又係超感動,大風吹到眼水直瞟,臨走時自己再玩多次,唔知係咪工作人員明益尾班乘客,轉極都唔完。我由淡淡定定,變到心入面開始數佢轉左幾多個圈。

嘩,轉左六個你仲未停既…

分明係尐人報復我地要佢地OT

玩完動感樂園幾件大野,好心足,唯獨嗰個碰碰車就十年都排唔到,唯有放棄。去過山上水母館睇尐類似懸浮維港膠袋既水母,就同謹慎既朋友會合,齊齊坐纜車落山。

謹慎朋友落山嗰程扮晒驚呼狂叫,當正自己真係玩過 機動遊戲。難得勇氣可嘉,循例都要嘉許。

去到山下,睇表演,音樂噴泉激光噴火,完全幻采詠香江。食尐野,就去咩館咩館行逛。入館無耐,就話有海星摸,大人細佬爭住搶,仲有阿媽狼死到叫個仔成隻海星反轉佢黎摸,分分鐘叫佢摸海膽都無執輸。海洋館好多魚,魚樂無窮,但又靚到好似電腦效果,硬係覺得好唔實在。朋友指住眼前個隊銀色既係藍鰭吞拿,我話不如由水水公園攪埋繁殖批發,寓賺錢於保育,駛鬼板前撲去日本競投,朋友睬我都傻。

跟住去到熊貓館,好精彩,入面一隻熊貓都見唔到,你淨係可以透過個閉路電視,十足補習社遙距課程睇住佢攤喺度,唔郁,不如以後咪鬼叫 安安”“佳佳,就叫 吽吽” “,又或者 食食” “

去到另一個館睇另一對熊貓,就知咩叫敬業樂業 :一隻攤喺地瞓喺你面前任你影,順攤到以為係人扮,另一隻就夜媽媽匿埋一角食宵狂吞竹葉。唔知係咪為左避免打擾其他動物既好夢,成個館黑媽媽,只有幾抹紅光,同鬼屋差唔多, 陰森恐佈。之後去睇鱷魚同金魚,前者當然見唔到,後者就硬係覺得佢地皮膚有事,呢度一撻嗰度一撻,個頭口腫面腫,你話受輻射影響我都信,都係見慣尐大條錦鯉靚尐。

逛多兩逛,人潮漸散,一行人帶住疲倦既身軀空肚返歸,喺旺角食埋宵夜,就各自歸家,返到屋企一瞓即著。

日子好盡興,七八個鐘童心爆膨,同最好朋友vee嘩鬼叫,亂up廿四,盡興而歸。要開心,就要放﹔有得happy,就要happy到底。我係屬於水水公園標誌係海馬嗰一一代,細個時黎度係純玩,大嗰左就係黎呢度釋放。做得大人耐,想快樂,就最緊要唔好忘記自己其實都仲係細路哥,一個仲有童心既人,唔會壞得去邊,亦會識得自得其樂。開心到冇人吹得你脹,開心到唔使理人依依哦哦, 百五蚊換日美好回憶,星期一再同壞人周旋過,日子,就是好好過。                                                                                       

沒有留言: