2011年9月28日 星期三

遇強愈強

昨晚跟前DJ陳強吃晚飯。

年紀輕輕,夠POP、有諗頭、沙膽,難怪黑紙一紙風行。

佢老人家夠坦白,讚人無保留,踩自己亦唔洗本,聽得我好爽心。

人,最重要是認清自己想做咩,然後全力以赴。係既,就甘心情願,咪鬼時不時又要生又要死,又要刀仔拮大脾。無論是為錢為名為普度眾生,應做就做,想做就去做,最多之後發財立品,就好。

強哥話我係一個謹慎、觀人於微既人(並非exact wordings),我當堂口都窒埋。自問講唔上話咩,只不過對世態有丁點粗疏既體會同諗法。就正如我同強哥講:思考,為的不是結果﹔什麼都想,純粹因為享受當中推敲、拆解、分析、揣摩、組織、申述、思辯的過程,對思考激生的火花天生敏感兼上癮。當然,箇中或許少不了若干曲高和寡、自命超凡既傲慢,但嗰種個人一廂情願的虛榮,絕對及不上思辯間正反衝撞咁痛快。

我明既,以文載道,好多有理想既青年人都好嚮往,無奈人類社會就是反智當家,很多人真的無心、無力、無從、無視思維清晰,意見或拾人牙慧,或隨波逐流,再有理想,頂多都是有心殺賊,無力回天。但我又覺得不打緊:認清人力有限,一切皆全決於一時一地一人之風尚,寫字純因不吐不快,但求斬妖除魔過把癮,就夠,用不著深生不忿枉求蒼天可鑑,便可。

做人匆匆一刹,最好過把癮便死,就算為錢,就要搵著自己鐘意做既野,賺到盡,最緊要自己享受兼滿足,又唔會有違自己做人既原則,食BUFFET都搏老命,何況人生可以係一場特盛既盛宴?

BTW,好多謝強哥對我BLOG既意見,無錯,想有專欄,唔使文筆上乘,跳三十八層樓死唔去,都會有人走黎搵你分享跳樓不死既奇技。社會畢竟市場主導,終歸睇準讀者需要,其外始終都要有層金玉,一旦有瓦遮頭兼具影響力,屆時呼風喚雨亦未可知。

所以,我地都BUY陶傑,都唔抗拒爽報。要假道學要霸高地要喺社會前學生前立威,我無興趣浪費生命。

2 則留言:

浪子m: 提到...

我都頗欣賞陳強

匿名 提到...

反對爽報的主要是兩種人: 一.道德塔利班, 二.土共. 當然, 也有集兩者於一身的人.