2011年6月22日 星期三

新移民,唔好再做蠢事害自己

我唔係要否定新移民既貢獻 – 因為你稍有質疑,就係歧視。反正何謂貢獻,太抽象,沒什麼思辯的需要和餘地。


不過我偏偏唔明,未派錢前,無人話 “住夠七年先算永久港人”係歧視,派錢無份,就忽然有人走出黎話未夠七年都係香港人,點解無得分,點解歧視我?先係你接受 “未夠七年”呢個條件而成為準香港人,轉頭你竟然認定自己喺完完全全既香港人?咁個七年之約仲有咩價值?

除此之外,點解我未曾聽聞有未住夠七年既印巴籍或歐洲人出黎抗議無六千?

當然,白人洋鬼子,你可以話佢地大部份黎得香港既,都係有錢人,唔稀罕。又或者佢地人少勢孤,無咩好爭。

我相信,好多新移民確實默默耕耘,做緊好多一般香港人未必願做既厭惡性工作,佢地有人追求福利,亦有人係追求自由。問題係偏偏有小數追求福利既人當真如狼似虎兼不知進退,一點老鼠屎,弄污了一大鍋粥。你可以話香港大把人騙綜援騙什麼﹐但唔等於你作為新移民可以東施效顰理直氣壯。尤其作為遲來者,受本地人歧視,是不對,但必然,唔諗點樣威俾港人睇證明自己有價值,卻反過黎一開口問點解你有我無,唔怪得香港人因這群小數人而抄家連坐,譏之蝗蟲。

“Ask not what your country can do for you; ask what you can do for your country.” Respect must be gained. 新移民真係要緊記,尤其是今日風頭火勢既境地。奈阿爺唔何,政府又廢柴,自由行財大氣粗罵不得,正值群魔亂舞,如果你繼續自毁形象,或任少數人污衊整個群體,或對國內同胞既種種劣行不聞不問,土生土長既香港人,必然搵著你黎祭旗,因為你地當初心馳神往既香港特色,正因為你地少數人既膚淺、貪婪、愚昧而流逝、殆盡。

所以,攞錢有審查,要填表,唔好嫌麻煩,層層關卡,都係想話俾你聽:香港仲係有制度、程序、無人要特登留難你。否則開架飛機高空掟錢任你執好味?執到幾多靠自己,咁叫公平味?

1 則留言:

Tata 提到...

"歧視" 已被濫用了。
我地歧視既, 只係飯來張口的人, 只係一心想坐享其成的人, 只係財大氣粗的人, 只係沒有修養的人, 對自由人是也, 新移民是也, 香港人是也, 外國人是也!
"歧視" 唔係萬試萬靈既擋箭牌!!

P.S. 本來好忿怒, 睇到 "否則開架飛機高空掟錢任你執好味?執到幾多靠自己,咁叫公平味?", 忍唔到笑左出嚟...