2011年5月25日 星期三

邊個用"唐氏綜合症"呢個名?

話我有偏見都係咁講。


要逞一時小聰明,都唔好用一些弱勢社群。

叫得某特首熱門候選人言行屬"唐氏綜合症",意思就係想笑那人膠、白痴、低能,

口出此言既人,一定先係真心覺得真正既唐氏綜合症患者就係低能同白痴,所以先自覺將呢個稱呼用喺唐唐身上簡直天衣無縫,用後沾沾自喜,愈傳愈廣。

香港人,沉迷惡攪既,通地都係。你要止於泄憤係一回事,但咪鬼禍及無辜,咪鬼借患者過橋,但求嘩眾取寵,換一時喧囂。

一個詞語,諷刺欠奉,只有涼薄,只有愚昧,不斷話"正"既人,老實同你講,唐唐同你講野,佢又何曾當你智商正常?

筆者唔係要掃興,但係下下只能、亦只知逞一時口快,唔代表我地好醒,只代表我地無力,淪落到要靠呢d隔山泄憤既反抗方式。當年秦檜害死岳飛,全民發明油炸鬼取其楷音"油炸檜",何嘗不是過癮?最後又如何?無實際行動,壞人咪又係善終!幾時聽過有宋人因此悲憤莫名造反抗議,要為岳飛討回公道?

香港,腦筋快既人,好多,但係大多只係妄想自己身處個人大舞台,求萬人之垂注,做其First among Equally Helpless 。歡呼聲中,他忘了自已人其實不過、仍然、恒常是扯線玩偶而已,意氣風發,挽不回極權眼裡多少尊嚴。

沒有留言: