2011年1月17日 星期一

好多雀仔亂咁飛

一句到尾,前輩話你新生代要知足惜福,但佢地從未諗過當年佢地不過扶碌。

不如咁啦,我同前輩你交換,我代你坐享七八十年代既經濟騰飛,你黎喺九七後大中華懷抱裡面奮鬥,好唔好?

做慣奴才既人,佢永遠都唔明作為奴才既你做咩要無端做主人。做主人有咩好﹐做奴才好差咩?有錢有尊嚴,你嘈,一句到尾都係為錢啫。咁而家經濟唔係話好,你後生仔當然要睇我地呢班前輩煮出黎既餸黎食飯架啦,後生仔你唔係唔肯捱下嘛?

前輩你嗌我努力,就等同於你一路緬懷日治時期幾咁"安定繁榮",然後要生喺大躍進既我努力做人,係呀,日本仔嗰時我都唔係日日有飽飯食,而家你一時大饑荒啫都忍唔到?八年抗戰點都辛苦過你三年饑荒下嘛!

前輩,唔係話後生唔肯捱,但係如果捱係近乎糟質,根本睇唔到前途,連基本生活都維持唔到,點捱呀?

我地從來都唔止講錢,仲講良知、公義、人權,點解?好簡單,我地寧願自行我路打死無怨,都唔願俾你地當魚餌雀料咁舞。前輩你繼續為政權抬橋,繼續為既得利益者剝削群眾從中抽水,一係就促成後生仔更倍奴才更廢柴,一係就迫後生怒髮衝冠決心返枱。

何況,你自己教仔都唔會動輒警告佢唔生性就家毁人亡,你用呢招黎向全港既新生代講野?真係比阿爺更阿爺。

就係因為好多雀仔亂咁飛,我地呢d就做雀縮就唯有等死。唔係話當中無條變成蝴蝶,有,一定有,但係萬中無一時也命也,只限幾行出路。但係你咁食法咁飽法,做蟲都會反抗咬人。

另祝古巨基能人所不能,險勝宇宙最受歡迎男歌手林峯。
我相信下年林一定更進一步﹐來年成為天地人最受歡迎男歌手,跳出三界外,不在五行中。

沒有留言: