2010年11月3日 星期三

以後教會搵邊個起教堂?

無喇,今回,天主教會挑戰財神既化身,肯定無運行。
係呀,轉世財神,緊係勁過天父。財神同天父話契你,你契俾邊個先?
以後慘啦,教堂唔可以俾佢地起﹐否則隨時窗台太過禮拜堂,十字架都放唔落,做彌撒都要企出停車場。
不過放心,會所一定有,冷氣指定型號,包上網。
之前打唔成咁多次風,我信次次都有人認真祈禱望打得成,哈,偏偏力場舉世無雙,颱風撻Q撞棍咩都得,又一次證明財神既神力,連風雷電都控制到。
不過唔單止話令颱風調頭,佢老人家吸金能力,都有一手:起毫宅當豪宅,專益同胞,簡直係人肉黑錢百慕達,多多都受。自己人?就近堆田心曠神怡,嗦一嗦,成世都唔敢再亂製造垃圾,誓神環保,算係教育群眾。
無計啦,鬼叫阿老人家大名我細細個就聽過,伴我成長幾廿年,同舟人誓相隨,我實緊跟佢呢個舵手,簡直要傚法魏忠賢起生寺供奉添香油。佢成日叫人量力而為,係叫抗爭示威嗰班,嘩,我無辦法唔認同,尤其是撞正超市大減價既時分。
所以我最支持普選,咁到時我就可以選佢老人家,起碼好過而家嗰個教徒特首。

沒有留言: