2010年1月3日 星期日

無痛呻吟 五

當有人會為無線記錄片"活著"既露點土人而向影視處投訴,我就知道有人會視元旦遊行既肢體衝突為激進、大亂。

香港人出名大驚小怪,露點如是,遊行如是,純粹趁墟叫囂。

我唔贊成社民連及少數人動作太過,唔係因為佢地既行為太激進--因為假如咁都叫激進,屋邨波地d死飛仔打架搶場就係世界未日!情勢混亂,有人熱血,有人亢奮,有人緊張過頭,衝突必然,唔使好似大鄉里出城teletubbies。我反對既係無目的、無意思的肢體衝突。試問你假如無厘頭地喺人群中俾人唔覺意踩死左,又或者你忽然興奮過度發羊吊窒息失救,香港人有品既,會話你係一個stupid casualty或者不幸,唔會當你係烈士。咁樣無辜死去,信息無,表態無,理由零,兼非直接死於政權無理鎮壓,最多話方行動過左火或者兼顧唔黎,你話幾無謂。

香港民主活動一池死水,講原罪,都係要怪香港人,一黎貪生怕死,話要民主都係為自我感覺良好,真係無,佢都頂多十足深宮怨婦屈埋心裡,唔會正面反抗。二黎香港人終歸係中國人,對極權忍耐力異常高,明明怕閃失蝕底,就話要理性溫和,最好就阿爺高抬貴手唔使自己郁手,否則就要有人帶頭送死先,緊隨其後又怨天怨人。三黎港人受既所謂壓迫,比起八九年東歐人所受既差萬九幾倍。就以東德為例:

1. 歐洲人比東方人更重獨立自主,唔似香港人下下依賴。
2. 東德當年高壓統治,言論大禁。秘密警察stasi捉人拉人審人不經程序,任何人都可能係臥底,會通風報訊出賣自己抄家滅族,人人自危。香港有無咁差?所謂既迫害,程度差天拱地。
3.東德窮到嘔血又百物騰貴,相比對面西德,生活質素之低簡直彰彰明甚,不堪入目。窮,通常會係抗爭既主因。香港?大部人就算賺唔多,都唔叫窮,都可以維持一定既生活質素,吃喝玩樂不假外求,有咩好呻?有咩好不滿?大把人都係求溫飽啫!
4.東德當年既共產制度係unsustainable,佢冧係遲早,東德人反佢係一定﹔而家視國擺明行資本主義,香港叨光都黎唔徹。再加上香港權力集中於政權、商家同專業人士,三者相互勾結法西斯,勢力簡直固若金湯,無人反佢,佢地樂得自在。
5.當年蘇聯改革風氣東至,再加自由資訊循地下渠道湧進隔絕世界已久的東德,變天氣氛醖釀,大環境令東德人有勇氣走上街頭抗爭。香港?家陣個個都睇中國頭,點會置喙?外圍環境氣氛慘淡,香港人要自食其力。

所以我點解一路話,香港人受壓未夠,而家係唔會起黎黎真反抗。祖國勢頭好,大部份人又衣食無憂,飽食終日,就樂於無所用心,大家一心儲埋個錢享受生活。所謂既不滿,純粹係一種壓抑、絕望既氛圍,並非關乎生死的切膚之痛。針唔拮到肉唔知痛,一日仲可以生活優悠,一日仲可以冧女溝仔睇煙花倒數買名牌扮靚打機,香港人係唔會咁好氣爭取民主。自主自決既尊嚴,做慣殖民地子民、依賴慣強權既香港人係唔會當一回事。你問若干人點解想爭取民主,佢甚至會話你聽:佢純粹想小中共!點解?因為憎大陸喱無品庸俗!咁你又有幾高貴?因為我敢走出黎爭取民主囉,唔似大陸喱做奴才!咁但係你喺香港先得咁得戚啫︳人地喺大陸攪抗爭隨時命都無。你咪理,我最憎大陸喱!

所以,我對香港既民主運動,未至絕望,都係近乎失望。無奈我又有團火,明知不可為而為之,雖千萬人吾往矣。寫幾隻字唔係話好巴閉,只不過係仲有d尊嚴同良知,想對得自己對得人,僅此而已。

3 則留言:

vvip 提到...

唔 比人覺得似 散沙一盤

嚴櫻 提到...

vvip:

散沙都算,超碼有機會聚埋一堆
而家個個都係老連咁大舊石頭,沖唔郁吹唔郁!

vvip 提到...

嚴兄,
係哦 越細粒 越易聚 大舊石頭 同大舊石頭
真係好難聚埋一堆哦,點攪好?