2010年1月29日 星期五

愚者千慮

五區議員請辭,循例有人"懶"係洞明世情,指摘佢地別有用心、居心叵測、為利益為著數
呢類人好過癮:佢地明明語無倫次,連自己都唔知自己諗咩﹔但係佢地竟然話你聽,佢地睇得穿人地諗咩
先不講佢地跟本講唔出議員得到d係"利益"
就當總辭議員成全公投,當真有利可圖
但係佢地做緊既野,係唔係一件應該做、值得做既一等啱事先?
倘若佢地做既野係啱既,係兼顧大眾利益既,係義不容辭既好事
你駛咩理佢係唔係從中得到d咩好處?
辭職若然利人利己,佢又得益,你又可以發聲,無人有損失,€何樂而不為?
除非係你一味驚會激怒阿爺,先會畏首畏尾
不過我話你聽,阿爺同香港人係兩個世界既人,睇野完全唔同,佢喜怒無常,你係觸摸唔到﹔你捉到路既,早就做左政協人大,唔駛喺到爭民主
你想阿爺唔嬲?完全放棄普選支持委任,阿爺錫你都黎唔徹,係奴才就奴才,點遮都遮唔到--唔係話做奴才係咩,只不過係夏蟲不可語冰。
我只覺得:想做奴才,不妨坦承,唔好故作熱血,平時奄鶉,有人出頭又指指點點,倖災樂禍,羸谷輸縮。民主唔係請客食飯,亦唔好諗住靠幾個議員就能回天,講到尾都係要靠自己一個一個挺身而出。一味只識講"官人我要",官人唔會對你真係呵護備至。
你無guts無理念無腰骨,就唔好話勇敢既議員們係激進、攪事--話晒佢地都係為左你地呢d不知感恩既藍血人爭取民主,普選成事,你都有份。
無膽挑戰權威,就唔好自作聰明,故作脫俗。
仲有個d所謂反對咩咩起義既小學生家長…
你地小學生咁既智商,我唔怪你
但係若然你地覺得自己做既野係咁啱,點解又要藏頭露尾?平時電視上鏡你地揮晒手慌死八嫂六婆見唔到,今日聯名登廣告咁威,連名都唔敢出,唔敢俾個仔攞番份野返學校威俾d同學睇?
你係覺得自己啱,點解咁拗底?你肯定街市阿姐找少你兩毫,都會大聲鬧臭佢啦啦!
好呀,你唔鐘意咁樣起義,咁你地有無上網簽署零八憲章?
無呀,掛住睇宮心計呀…
我話你知,唔好見話80後怨忿,唔好諗住搵班九十後00代既家長撐到痕--好到小學生都識分是非有良知
"我們不會跟這樣的議員起義",即係你地其實都想起義,不過跟唔落某某人啫下嘛,咁即係阿姐仔都支持公投啦!你唔跟甲,都話俾我聽想跟邊個啦,例如咩師奶殺手咁,你講啦你。
"甘生,我係唔會同你上床…" 家陣同你講話對你有好感啫,駛咩咁誇?
家陣叫你投一票啫,駛唔駛講到要跟佢地共赴黃泉玉石俱焚咁?你不投白不投,駛咩咁多小動作?
政府教改玩死你d仔女,你唔出黎嘈
母話教學害你仔女中英不通,你唔出黎嘈
d書賣到千幾銀一叠,你都無登報出黎嘈
你走黎為五區公投黎狗up?
如果我係個d小學生,
你唔怪得我出去索k唔返屋企…

1 則留言:

GuiltySky 提到...

昨晚毓民到長沙灣演講便出現以上情況

待了一晚, 聽長者們討論後
發現老一輩人的確是比較愚的

較聰明的老一輩比較知道, 他們自己人中有一堆是根本不懂得思考
即使有熱心聰明願思考的, 能洞察政府種種不公平的現象 (已談到梁展文,上朔至曾鈺成陳婉孄工聯會之誕生與墮落)

他們知道政府舞弊及年青一代前路茫茫
無奈仍未能了解總辭的用意, 個人觀察為對民主及其議會制度不公認知分析不足

智者尚且如此, 何況愚者?