2009年12月31日 星期四

無病呻吟 一

公安衝關一事,睇黎又係唔講唔覺,草草了事。
筆者說過:就算父子,老豆要入仔房,按道理都要敲門知會聲,大家有晒共識,唔使約法三章。家陣明明一國兩制,兼且道理在己,香港政府竟然忍氣吞聲,連句遺憾都無,做契弟做到咁,感覺唔似香港係中國一部份,似民初日本仔走入華界人殺人,誓要迫死精武門的陳真。
家陣香港似咩,就似對老豆侵犯仔女置若妄聞既老婆,縱容獸夫不止,反而勸嗰女要合作聽話。點解?皆因阿媽唔想同阿爸鬧翻,兼且老豆生你養你捱生捱死,要感恩忍一忍。英治時睇鬼佬面色,尚且說得過去,家陣當家作主,老婆帶住姦夫上埋你屋企大樂透,你都要同佢斟酒助興,咩世界?

英漢疑販毒被判毒針處決,祖國不理英國要求,在未有核實犯人的精神情況下草草了事--唔係話偏幫個鬼佬,但係中國政府至少都該做埋驗證呢步,又或者死緩了事。家陣咁急,無他,為啖氣,好似劉曉波一樣,外人愈要理,我就愈唔衰得俾你睇,偏要玩野,咪當我晚清洋奴。威就威,d阿蓋達網上斬個人頭落黎、塔尼班喺眾目睽睽下炸冧佛像,何嘗唔威?想外國干預司法,有種唔好用民運份子做籌碼,下下送佢地去保外就醫!

民議調查顯示總辭支持度偏底,頂,話遊行示威絕食無用批泛民無膽係你,家陣稍創新猷合理合法攪總辭,你又話唔好,驚中央不甘受壓怒羞成怒。你地唔想抗爭,我唔怪你,民主或者對你黎講並非關鍵,有野食有野玩不知幾盞!咁請你班友仔唔好再懶係嚮往民主死霸道德高地,投日既就唔好當自己曲線救國!反正畏首畏尾,當初又何必故作勇猛?

一國兩制,一國大於兩制,等唔等於要摧毁兩制,唔好再用一國壓我﹔一係當初咪鬼左閃右避,講咩兩制--反正大陸家下仲資本主義過香港。循序漸進?你中共學咩人教香港人點行民主?個序喺邊?點序法?一陣你會話香港可以實行有中國特色既民主選舉,即係咩?就係無民主特色的民主選舉?要共識?中共識嗰d就係共識!十三億人公投?江澤民同哈薩克、俄羅斯劃界割土都無公投,香港普選你反而嗌公投?你政治局常委選邊個有無得公投?

六十年國慶,你上代俾中共殺得雞毛鴨血,你今日仲同佢祝壽?佢道歉都無句,你反而要歡天喜地?話我做咩咁記仇唔放開胸襟?原唔原諒你係受害者既權利,記仇係應份既,係受害人有交待,論到你班共奴出聲咩?

2 則留言:

匿名 提到...

if the Chinese government contravenes (違反) the Basic law, can we complain to the British Embassy 英國大使館 ?

嚴櫻 提到...

匿名:
你仲可以去日本領事館換番d軍票tim