2009年12月20日 星期日

八十後之盛怒

八十後點解咁忿慨?因為佢地覺得俾一班純粹比佢地早十零年出世的所擺播玩弄,而社會上既既得利益者亦實在去得太盡,搶得太狼,令到佢地喺感覺上有一種我為魚肉的無力感。

既得利益者,任何時代都有,但喺港英時代,至少港英政府會走黎仲裁,警告班友咪太狼死。剥削太過,低下階層會反抗,會令社會動盪。聰明既港英政府,識得到時到後喊班友仔聽訓,一副君臨天下既氣慨。

今日既特區政府,佢明知自己唔係民選,權力建基阿爺福蔭同既得利益者(同時間為親中陣營及忽然國派)簇擁,向巴結都黎唔切。所以就利益輸送成行成市,又有把鬼富豪閒時口騰騰腳震震走出黎指點江山捧誰撐誰。

當然,另一個更關鍵既因素,就係隨著中國飛黃騰達,而香港又日漸歸化中共,香港人的獨有優勢已經逐步喪失。香港無論邊行,靠要靠大陸接濟,但又無話唔可以俾大陸人所取代。過去大陸人淨種蕃薯割禾,唔配同香港人爭﹔而家?香港要幾百萬鬥上面幾億!加埋又有本地群英主動出賣本地專業人士利益,一將攻城萬骨枯,嗰市頂到爛晒,香港新生代再天資聰穎、再發奮做人都無得鬥!

前途渺渺,想靠自己爭取改變又政治無力,內外交困--先有上代人攔腰一劈,再來祖國億萬同胞萬箭穿心,除非有命有錢有本事移民,否則我等坐困愁城既一班所謂八十後,註定上場拳拳到肉打鑊甘。無架啦,除左d炒炒賣賣同傳統律師醫生(律師競爭激烈,新醫生又飽受欺壓人工有血有汗),你做咩都係入錯行。明知係俾你班契弟玩緊,我唔反你?

沒有留言: