2009年12月17日 星期四

頂!怕輸?

怕輸?你知唔知共產黨點解唔肯推行民主選舉?因為佢同你一樣,都係怕輸!

你唔好以為我地對你既支持係必然 --你個席位唔係為你度身訂做,選得你上來,就可以拉你落馬!

絕食?共產黨做咩在意你絕食?六四成千學生喺北京天安門絕食,中共眼眉都無郁一下﹔你幾個友仔想靠絕食?究竟係你地唔理性,定係我地激進?

點解今時今日,你地仲覺得可以喺中共設既局裡面,可以靠磨欄席黎令中共屈服,甚至可以偷到中共雞?話俾我聽,你憑咩認為中共要怕你地?無公眾喺背後支持你地,邊個驚你地?無公眾喺背後支持你地,你地喺呢廿年做得出咩成就?

你話你地好清楚中共,中共同樣睇死你地拗底假大空!你地既畏首畏尾,你地既龜縮尸位,就係中共既好朋友!請你地咪鬼再用冷靜掩飾虛怯,以理性掩飾計窮!

我話你聽中共最怕咩--中共咩都唔驚,群眾佢亦唔驚!佢最驚既,係唔錫身、唔要命、唔要錢既怒民!佢最怕你同佢以命相搏,玉石俱焚!你諗下,假如有一千萬中國人肯唔要命同中共死過,你估班友真係會以身徇黨?早就拖男帶女匯錢走佬啦!就係中國人怕死,中共於是可以用殖民地形式,每一個人統治幾廿萬人,行其小數集團統治!

醒啦你,民主黨!

1 則留言:

vvip 提到...

民主黨! 就係正正怕死,嘩 香港咁多好野.點捨得死呀?